Zaurun narkomanı efirə çıxarması qalmaqal yaratdı: “Pula görə...”
Son illər yerli
teleməkanda yeni “trend” yaranıb. Aparıcılar tez-tez “TikTok”da,
“İnstagram”da məşhurlaşan şəxsləri efirə dəvət edir, onlarla müxtəlif
məsələləri müzakirə edirlər.
"Bizimləsən" verilişinin son buraxılışında aparıcı zaur
Baxşəliyevin təşəbbüsü ilə bu hadisə yenidən yaşandı. Belə ki, bu dəfə
proqrama sosial şəbəkələrdə məşhurlaşan Hikmət “Sovetski” qatılıb. O,
efirdə narkotikə qurşandığı illərdən danışıb. Sözügedən şəxsin
efirə çağırılması cəmiyyət tərəfindən birmənalı qarşılanmayıb, bəziləri
narkomanın televiziyalarda göstərilməsini sərt tənqid edib.
Məsələ
ilə bağlı Yenisabah.az-a danışan teleaparıcı Rövşanə Ağasəfqızı
aparıcıların bunu reytinq xatirinə etdiyini bildirib.
O, bu cür halların
yolverilməz olduğunu bildirib: “Onlar bunu reytinqə görə edirlər.
Aparıcılar, layihə rəhbərləri bəzən reytinqə görə hər ucuz yola əl
atmağa məcburdur. Onlar görürlər ki, həmin şəxslərin “İnstagram”da,
“TikTok”da baxış sayları çoxdur və düşünürlər ki, onları efirə dəvət
etdikdə tamaşaçı sayını artıracaqlar və bununla da reytinq artacaq.
Reytinqin artması da pulun artması deməkdir. Televiziyalar artıq biznes
sahəsinə çevrilib. Bu normaldır, çünki özəl telekanallar özlərini
dolandırmalıdır. Amma məsələ bu deyil, əsas məsələ hansı şəxslərin efirə
çağrılmasıdır. Televiziya başqadır, onu sosial şəbəkələrlə bir tuta
bilmərik. Baxmayaraq ki, bu gün sosial şəbəkələr telekanallardan daha
populyardır, amma bəzi qaydaları nəzərə almaq mütləqdir. Bu gün
gənclərin hamısının əlində telefon var, heç kim oturub televizorda 2-3
saatlıq verilişləri izləmir. “TikTok”da da çox səviyyəli, ağlı başında,
maraqlı kontent yaradan şəxslər var. Onları efirə dəvət etmək normaldır.
Çünki onlar cəmiyyətə faydalı ola biləcək hər hansı mesajı verməyi
bacaracaqlar. Bir insanın obrazı yoxdursa, cəmiyyətə faydalı nəyisə
aşılaya biməyəcəksə, o insanı ümumiyyətlə, efirə buraxmaq olmaz”.
Aparıcı özü də vaxtilə reytinq xatirinə kimlərisə efirinə çağırmağa məcbur olduğunu etiraf edib: “Sabah
deyə bilərlər ki, Rövşanə, axı sən özün də reytinqə görə kimlərisə
efirə çağırmısan. Bəli, mən də bunu etmişəm, buna məcbur olmuşam. Ona
görə teleaparıcıları qınamıram. Bu gün hər kəsin qarşısına bir siyahı
qoyulur və deyilir ki, reytinq verməlisən. Reytinq vermədinsə, verilişin
bağlanacaq və işsiz qalacaqsan. Bu gün telekanallara nəzər yetirsəniz
görəcəksiniz ki, elə adamlar efirdədir ki, onları əslində heç kanala
buraxmaq olmaz, amma 5-10 sponsoru var deyə televiziyadadır. Bu zaman
savadlı jurnalistlər kənarda qalır. Çünki savadlı jurnalistlər özlərinə
sığışdırıb sözügedən adamları efirinə çıxarmaq istəmir, onlarla bir
efiri bölüşmək istəmirlər. Belə olan halda da telekanal rəhbərliyi deyir
ki, reytinqin aşağıdır səninlə niyə işləməliyəm? Məsələ budur.
Tiktokeri, blogeri efirə çağırmaq olar, əsas odur ki, o öz fəaliyyəti
ilə cəmiyyətə fayda verə biləcək nələrisə danışsın, hesab edirəm ki,
hansısa narkomanı efirə çıxarmaq olmaz”.