CNN telekanalı Gürcüstanın eks-prezidenti Mixail Saakaşvilinin yeni kadrlarını nümayiş etdirib.
Video siyasətçinin müalicə aldığı Tbilisidəki Vivamed klinikasında onun otağında quraşdırılmış müşahidə kameraları tərəfindən lentə alınıb.
Teleaparıcı tamaşaçılara xəbərdarlıq edib ki, çəkilişlər onlar üçün çətin ola bilər. Efirdə məhkəmə iclaslarının birindən videogörüntü də nümayiş etdirilib, o zaman Saakaşvili klinikadan videobağlantı vasitəsilə qoşularaq köynəyini qaldıraraq vəziyyətini tamaşaçılara nümayiş etdirib.
Saakaşvilinin amerikalı vəkili Massimo D'Angelo da CNN-in studiyasında olub. Vəkil Gürcüstanın eks-prezidentinin səhhətinin kritik durumundan danışaraq, “sürətlə pisləşməkdə davam etdiyini” vurğulayıb.
D'Anjelo xatırladıb ki, siyasətçidən saç, dırnaq və bədən toxumalarından nümunələr götürülüb, bunu araşdırdıqdan sonra ABŞ-dakı laboratoriyalardan biri Saakaşvilinin bədənində ağır metalların, xüsusən də civə və arsenin miqdarının artması qənaətinə gəlib.
Vəkil həmçinin xatırladıb ki, bir çox Qərb liderləri Gürcüstan hakimiyyətinə eks-prezidentin azad edilməsi və xaricə müalicəyə göndərilməsi çağırışı ilə müraciət ediblər. Bundan əlavə, 27 Avropa ölkəsi Saakaşvili ilə həmrəy olduqlarını ifadə edərək, onun azad edilməsini istəyiblər.
Vəkilin sözlərinə görə, ABŞ-ın Saakaşvilini xilas etmək üçün göstərdiyi səylər yetərli deyil.
Fevralın 6-da Tbilisi şəhər məhkəməsinin hakimi Giorgi Arevadze Mixail Saakaşvilinin vəkillərinin səhhətinə görə cəzanın təxirə salınması və ya cəzadan azad edilməsi barədə vəsatətini təmin etməyib.
Bir gün əvvəl Saakaşvili Gürcüstanın Xalq Müdafiəsi İdarəsinin ona müstəqil tibbi şura göndərilməsi xahişi ilə müraciət edib.
O bildirib ki, son günlər özünü daha pis hiss etməyə başlayıb. Eyni zamanda, Gürcüstan Ədliyyə Nazirliyinin nümayəndələri deyirlər ki, Saakaşvilinin kritik vəziyyəti ilə bağlı söhbətlər piar kampaniyasının tərkib hissəsidir, onun özü simulyasiya edir, Amerika şirkəti isə azadlığa buraxılması məsələsində lobbiçilik edir. (oxu.24.com)
835
