Qəbələdə Nohurgöldə batan məşhur alimin jurnalist oğlu imiş - FOTO

Bir neçə gün öncə Qəbələdə Nohurgöldə batan İlham Qəribov məşhur alim İslam Qəribovun oğlu imiş.

40 yaşlı İlham Qəribov özü də bir müddət mətbuatda müxtəlif qəzetlərdə çalışıb.

Mərhumun atası isə filologiya elmləri doktorudur, AMEA-nın ədəbiyyat institutunun aparıcı elmi işçisidir.

Bakıda yaşayan İ.Qəribov əslən Lerikin Molalan kəndindəndir.(sitat.info)

***

Qəbələ rayonu Nohurqışlaq kəndindəki Nohurgöldə meyiti tapılan şəxslə bağlı təfərrüatlar məlum olub.

Lent.az-ın əldə etdiyi məlumata görə, mərhum 40 yaşlı Qəribov İlham İslam oğlu yanvarın 16-da yaşadığı Bakının Binəqədi rayonu, Əcəmi Naxçıvani küçəsindəki evdən axşam saatlarında çıxaraq, bir daha geri qayıtmayıb.

Axtarışlar zamanı onun meyiti Qəbələdə yerləşən məşhur Nohurgöldə tapılıb. Meyitin üzərində zorakılıq əlamətləri olmayıb. Onun ölümü ilə bağlı digər versiyalar hələlik bəlli deyil.

Qeyd edək ki, əvvəlcə İlham Qəribovun gölün sahilində çantası aşkar edilib. Çantanın içərisində onun mobil telefonu, pasportu və digər əşyaları olub.

Faktla bağlı araşdırmalar davam etdirilir.