Dəridə qaşınmaya səbəb olan əsas amillərdən biri hava şəraitindəki dəyişikliklərdir. Xüsusilə qış aylarında hava istiliyinin dəyişməsi ilə yaydakı isti və rütubətli hava yerini daha soyuq və quru havaya verir. Bundan əlavə, ekzema kimi dəri xəstəlikləri və ya hormonal dəyişikliklər də qaşınmaya səbəb ola bilər.
Qlobal.net bildirir ki, qaşınmanın müalicəsində ən vacib məqam onun səbəbini düzgün müəyyən etməkdir.
Qaşınma, qida maddələrinə, böcək sancmalarına, polenlərə və dərmanlara qarşı allergik reaksiyalarla, həmçinin ekzema, sədəf xəstəliyi və quru dəri kimi dəri xəstəlikləri ilə əlaqəli ola bilər. Bundan əlavə, qıcıqlandırıcı kimyəvi maddələr, kosmetik məhsullar və digər maddələr də qaşınmaya səbəb ola bilər.
Gecələr dəridə qaşınmanın bir neçə mümkün səbəbi var:
Avtoimmun reaksiya: İmmunitet hüceyrələri sağlam hüceyrələri yad maddə kimi qəbul edərək onlara hücum edir, bu da iltihaba və qaşınmaya səbəb ola bilər.
Bədən istiliyi: Gecə bədən istiliyi artarsa, dəri daha çox qaşa bilər.
Quru dəri: Gecələr bədən nəm itkisinə məruz qalır və bu da qaşınmaya səbəb ola bilər.
Hormonal dəyişikliklər: Gecələr bəzi iltihabı azaldan hormonlar daha az ifraz olunduğu üçün qaşınma arta bilər.
İsti mühitlər: Qışda evlərin isti və quru havası da qaşınma səbəblərindəndir.
Nəmləndirici kremlər: Ətirli və rəngli nəmləndiricilər bəzən dəriyə daha çox zərər verə bilər. Təbii tərkibli nəmləndiricilər istifadə etmək tövsiyə olunur.
İlıq duş: İsti duş qaşınmanı artıra bilər, ona görə də suyun ilıq olmasına diqqət edilməlidir.
Soyuq kompres: Nəmləndirilmiş soyuq bez və ya buz torbası qaşınmanı azalda və ekzema ləkələrinə faydalı ola bilər.
Kortikosteroid kremlər və məlhəmlər: Dəri qaşınır və iltihablıdırsa, həkim dərmanlı krem və ya məlhəm tövsiyə edə bilər.
Ağızdan qəbul olunan dərmanlar: Bəzi antihistaminiklər və ya antidepresanlar uzunmüddətli qaşınmalarda faydalı ola bilər. Dərman seçimi həkim tərəfindən edilməlidir.
İşıq terapiyası (fototerapiya): Dəri müəyyən növ işığa məruz qoyularaq müalicə olunur.
Stress dərinin təbii qoruyucu funksiyalarını poza bilər, dəriyə lazım olan qoruyucu maddələrin (lipidlərin) istehsalını azalda və qan axışını dəyişdirə bilər. Bu da dəri qızartısı, quruluq və qabıqlanma kimi əlamətlərə səbəb olar – və nəticədə qaşınma yarana bilər.
Əgər stressdən qaynaqlanan qaşınma yaşayırsınızsa, həm emosional, həm də dəri problemlərini birlikdə müalicə etmək faydalıdır. Yaşam tərzində edilən dəyişikliklər – nəfəs məşqləri, əzələ boşaltma texnikaları, meditasiya – sakitləşməyə kömək edir. Bədən nəmini qorumaq, balanslı qidalanmaq və yaxşı yatmaq da dəri sağlamlığı üçün önəmlidir.
Dəri xəstəlikləri, şəkərli diabet və ya allergik reaksiyalar kimi bir çox səbəb ayaqlarda qaşınmaya yol aça bilər. Adətən bu, ciddi bir sağlamlıq probleminə işarə etmir.
Qarın bölgəsindəki qaşınma kontakt dermatit, avtoimmun pozuntular, infeksiyalar, hamiləlik, dərmanların yan təsirləri və xərçəng kimi müxtəlif səbəblərlə əlaqədar ola bilər.
Qaşınma həmişə xəstəliklə əlaqəli olmaya bilər. Saçın yenidən çıxması, günəş yanığı, böcək sancması, quru dəri və ya sağalma mərhələsindəki yaralar da şiddətli qaşınma verə bilər.
Əgər qaşınmanın səbəbi qaraciyərlə bağlıdırsa, dəridə qızartı olmur. Lakin davamlı qaşımaq dəriyə zərər verə bilər.
Bütün bədəni əhatə edən qaşınma qaraciyər xəstəliyi, böyrək çatışmazlığı, qan azlığı, şəkərli diabet, qalxanabənzər vəz problemləri və bəzi xərçəng növləri kimi daxili xəstəliklərin əlaməti ola bilər.
Xərçəng səbəbindən yaranan qaşınma, şişin ifraz etdiyi maddələrdən və ya bədənin ona verdiyi reaksiyadan qaynaqlana bilər. Qaşınma bədənin hər yerində ola bilər, lakin ayaqlarda və sinədə daha çox hiss edilə bilər. Xərçəng müalicəsi zamanı bu qaşınmalar adətən azalır.
Murad
Qlobal.net
217
