Növbəti 10 gündə Abşeron yarımadasında hava çox isti və rütubətli olacaq. Temperatur 40 dərəcəyə kimi qalxa bilər.

Qlobal.net xəbər verir ki, Bizim.Media-ya məlumat verən mühəndis ekspert Adil Əsgərov havanın temperaturunun tək istilik amili olmadığını qeyd edib: “Havanın temperaturu tək istilik amili deyil. Havanın rütubətliliyi də vacib faktordur.

Əmək Məcəlləsinin 233-cü maddəsinin 2-ci bəndinə, əsasən, 41 dərəcə selsidən yuxarı temperatur qeydə alındıqda iş dayandırılır. 2009-cu ilə qədər bu ədəd 45 idi. Bəzi şirkətlər istilik indeksindən istifadə edir və rütubəti də nəzərə alır”.

Növbəti 10 gün ərzində havanın rütubətliliyi günorta saatlarında 40%-i keçəcək.
“Bu isə o deməkdir ki, hava isti və çox rütubətli olacaq, eynən bu yay Avropada mütəmadi baş verən istilik dalğaları kimi. Buna görə də maksimum diqqətli olmağınızı tövsiyə edirəm”.

Ekspert bir sıra diqqət olunmalı, mühim məqamları göstərib: “Ürəyi xəstə adamlar, qocalar, uşaqlar çox diqqətli olmalıdırlar. Hər kəs maksimum dərəcədə günorta saatlarında açıq ərazidə günün altında olmamağı, həmçinin kölgəli yerdənsə, qapalı soyuq məkanda olmağa çalışın, küləyə və kölgəyə bel bağlamayın.

Qətiyyən yaxalanıb çölə çıxmayın, maksimum dərəcədə duşdan sonra qurulanın, suyun dəriyə hopması bədənin temperaturla mübarizəsini daha çətin edir.

Havanın axşam və səhər tezdən bulanıq olacağını nəzərə alın, Abşeron yarımadasında havanın ekologiyasında ciddi problemlər var və parnik effekti yaratma ehtimalı var. Yüngül, nazik və açıq rəngli paltarlar geyinin, niqab geyinən şəxslər əgər dini cəhətdən mümkündürsə qara rəngi əvəz edin.

Uşaqları, yaşlı nəsil və ev heyvanlarına diqqətinizi gücləndirin. Şəlakət hiss olunan yerlərdən uzaq durun, hava sirkulyasiyası vacibdir”.

Ekspert Bakının hal-hazırkı vəziyyətinə də təəssüf edir: “Doğrudur ki, Bakı asfalt cəngəlliyi və tıxaclar diyarına çevrilib, bunun həll yolu, əlbəttə, mümkündür. Dünyada bu məsələnin Bakı üçün adaptasiya olunmuş praktiki həllini bir gün gələcək və təmin edəcəyik, ümidliyəm”.