Qlobal.net müğənni, Əməkdar artist Almaz Ələsgərli haqqında maraqlı faktları təqdim edib.
Almaz Ramiz qızı Ələsgərova 6 oktyabr 1966-cı ildə Bakı şəhərinin Bakıxanov qəsəbəsində anadan olub. Almaz xanım ailənin beşinci uşağı, sonbeşiyi olub.
Erkən yaşda musiqiyə həvəs göstərən Almaz xanım 1985-ci ildə Azərbaycan Dövlət İncəsənət İnstitutunun “Musiqili komediya aktyoru” fakültəsinə qəbul olub və orada təhsil alıb. Bir müddət Azərbaycan Dövlət Musiqili Teatrda aktrisa kimi fəaliyyət göstərib.
1988-ci ildə Almaz Ələsgərli 4-cü kursda oxuyanda, bəstəkar Vaqif Gərayzadənin bəstələdiyi “Səni axtara-axtara” mahnısını Alim Qasımovla duet şəklində ifa edib. Bu mahnı hər iki müğənniyə böyük uğur gətirib.
Ancaq sonralar, öz sözlərinə görə, yorulduğundan Rəşid Behbudov adına Mahnı Teatrında işləməyə başlayıb. Rəşid Behbudov onun səsini dinlədikdən sonra - “get, ərizə yaz, mən səni teatrda işə götürürəm”, - deyib. Üç il teatrda işləyəndən sonra Rəşid Behbudov dünyasını dəyişib, müğənni də teatrdan uzaqlaşıb.
Elə həmin il müğənni özündən 20 yaş böyük kişi ilə ailə qurub. Bu evlilikdən onların Mədinə və Əminə adlı iki qızı doğulub. Ancaq bir müddət sonra bu evlilik uğursuzluqla nəticələnib. Onlar ayrılıblar. Müğənninin həyat yoldaşı başqa qadınla ailə qurub. Bu barədə Almaz xanım müsahibələrinin birində deyib:
“Anam, bacılarım heç bir halda istəmirdilər mən onunla ailə qurum. Onlar bizə elçi gələndə, anam dedi, mən elçilərin qarşısına çıxmayacağam. O, həm də istəyirdi ki, mən sənətimi davam etdirim. Amma mən onu sevirdim. Heç kimə qulaq asmadım, ona getdim, amma sonra alınmadı. Qızlarım sevgidən doğuldu. Ancaq dörd il sonra biz ayrıldıq. O, sonra qızları ilə maraqlanmadı. Qızlarım bir-iki dəfə onun evinə getdilər, sonra getmək istəmədilər. Dedilər, biz getmirik. Bəlkə də, onun yoldaşı razı olmayıb. Amma mən həmişə qızlarıma demişəm ki, atanızı axtarın, zəng vurun. İndi o, yoxdur, qızlarım atalarını unutmurlar. Mədinə xaricdən gələn kimi gedib qəbrini ziyarət edir. Əminə isə hər dəfə yada salır. Atasız uşaq böyütmək çox çətindir. Mənim uşaqlarım var, yox nədir bilirlər. Bizim sənətdə həm müğənni olmaq, həm də qadın, ev olmaq çox çətindir”.
Bir neçə il sonra müğənni ikinci dəfə ailə qurub. Hətta həyat yoldaşına görə sənəti tərk edib, evinə çəkilib. Ancaq iş elə gətirib ki, onun ikinci evliliyi də uğursuz alınıb. Almaz xanım ikinci həyat yoldaşından da boşanıb.
2014-cü ildə Əməkdar artist Almaz Ələsgərova ilə gənc müğənni Ramalın birgə fotosu yayılıb. Sosial şəbəkədə paylaşılan bu foto istifadəçilərin böyük marağına səbəb olub. Almaz Ələsgərova məsələyə münasibət bildirərkən Ramalla sevgili olduğunu nə təsdiq, nə də təkzib edib:
“Şəxsi həyatımla heç vaxt gündəmə gəlməyə çalışmamışam. Ona görə də bu mövzuda çox dərinə getmək istəmirəm. Sadəcə onu deyə bilərəm ki, Ramal Əsədzadə dərs dediyim Azərbaycan Dövlət Mədəniyyət və İncəsənət universitetində mənim tələbəmdir və mənə çox əzizdir. Hazırda da çox xoşbəxtəm”.
Bir neçə il əvvəl müğənninin səs tellərində problem yaranıb. Müxtəlif ölkələrdə həkimlərin qəbuluna gedən müğənniyə həkimlər səs tellərində yorğunluq olduğunu, dincəlmək lazım gəldiyini deyiblər. Bu səbəbdən də, Almaz xanım efirlərdən uzaqlaşmalı, sənətdən ayrılmalı olub. Bu barədə o deyib:
“Toylara gedə bilmirdim, bir az vaxt keçəndən sonra əziyyət çəkirdim, boğulurdum, səs tellərim tez yorulurdu. Əvvəl həvəs var idi. Görürdün biri klip çəkib, gedirdin sən də çəkdirirdin. Cavanlıq başqa bir şeydir. İndi yolu verdik cavanlara, sənətdən ayrıldım. Pandemiyada heç yerə çıxmadım. 2 ilə yaxın səhhətimdə problemlər oldu. Həkim demişdi, susmaq lazımdır, danışmaq olmaz. Boğazımda problemlər var idi. Şükür, çətinlikdən çıxdım, hər şey yaxşıdır”.
Müğənninin iki qızı ailə qursa da, sonradan onların ailəsində yaranan problemlərə görə hər iki qızı boşanıb.
Müğənninin qardaşı 45 yaşında xərçəng xəstəliyinə tutulub. Səs tellərindən əməliyyat olunub. Dənizdə işlədiyi üçün sağalandan sonra dənizə yollanıb. Ancaq üç-dörd gün ondan heç bir xəbər çıxmayıb. Ailə tərəfindən polisə məlumat verilib. Səkkiz gün davam edən axtarışlardan sonra onun meyiti dənizdən tapılıb və dəfn olunub.
Almaz Ələsgərli 1988-ci ildə “Bakı payızı-88” estrada artistləri müsabiqəsinin laureatı olub. 2000-ci ildə Azərbaycan musiqi mədəniyyətinin inkişafındakı xidmətlərinə görə “Yaxşıların yaxşısı-2000” müstəqil musiqi mükafatı olan “İlin ən yaxşı qadın müğənnisi” adına layiq görülüb.
2007-ci ildə Azərbaycan Respublikasının Əməkdar artisti adını alıb. 2016-cı ildə yenidən Azərbaycan Dövlət Musiqili Teatrına qayıdıb. (kulis.az)
1935
