Namiqi, Şəbnəmi Rusiyada tanıyan var?! – Ağlları çatsın, Rusiyaya getməsinlər

“Bizim müğənnilərin ağlı çatsın, Rusiyaya getməsinlər. Nə var Rusiyada?”
Bu sözləri “Yeni Sabah”a Azərbaycan Jurnalistlər Birliyinin (AJB) sədri Elçin Şıxlı deyib.
O bildirib ki, indiki halda azərbaycan müğənnilər ümumiyyətlə Rusiyaya getməməlidir:
“İkincisi, siz və mən, tutaq ki, günü sabah bilet alıb Rusiyaya getsək, ikimizi də ölkəyə buraxmayacaqlar. Çünki hazırda ruslarda Azərbaycana qarşı dəhşətli dərəcədə neqativ, faşist bir münasibət var.
Təsəvvür edin, Rusiyada, SSRİ-də ən güclü teatrlardan olan Moskva Akademik Satira Teatrının az qala 30 il direktoru olmuş soydaşımız Məmmədəli Ağayevi dələduzluqda ittiham edilib, saxlanılıb. Bu adamlardan nə gözləyirsiniz?! Bu Tver quberniyasının hər hansı bir cındır teatrı deyil.
SSRİ vaxtı Moskva Akademik Satira Teatrı barmaqla sayılırdı. İndi isə 30 il direktor olmuş adamı dələduzluqda ittiham edilir. Nə var bu Rusiyada?
Azərbaycan prezidenti “Əl-Ərəbiyyə” kanalına müsahibəsində dedi ki, Rusiya Azərbaycanı dəfələrlə işğal edib. Sonuncu dəfə 1920-ci ildə. Rusiyaya Azərbaycanı 2 yerə bölüb. Cənuba və şimala.
Bəxtimiz gətirib ki, dilimizi və özümüzü itirməmişik. Ona görə də, istənilən Azərbaycan vətəndaşı Rusiyaya gedəndə bir oxuyub görsün ki, onlar nə edirlər”.
Elçin Şıxlı qeyd edib ki, Rusiya ilə münasibətlərdən imtina edilməlidir:
“Rusiyada küçələrə kameralara qoyacaqlar, taksi sürücüləri rus deyilsə, işləməsinə icazə verilməyəcək. Əgər rus deyilsənsə, az qala sinənə bir damğa vuracaqlar ki, hara getdin, hardan gəldin…Belə bir yerə vətəndaşlarımız niyə gedir?!
Rusiyada toy edən azərbaycanlılar da başıxarabdır. Orada toy edərlər? Gəlin burada edin. Ümumiyyətlə, Rusiyadan imtina etmək lazımdır.
Nəzərə alın ki, Rusiyada hazırda ən azı 5 milyon işçiyə ehtiyac var. Rusların özü qocalır. Demoqrafik olaraq ruslar azalır. İçirlər, vururlar, nə bilim nə zir-zibillə məşğuldurlar.
Miqrantların gördüyü işlərə bunlar yaxın durmaq istəmir. Çünki miqrantlar sutkanın bəlkə də 12-15 saatını işləyirlər. Özləri bekar gəzir, sonra da miqrantlardan narazılıq edirlər. Xüsusən də Azərbaycandan. Çünki Azərbaycan Prezidenti rusların qarşısında baş əymir.
Bizim müğənnilərin ağlı çatsın, Rusiyaya getməsinlər. Nə var Rusiyada? Nəyə gedirsiniz? Namiq Qaraçuxurlunu Rusiyada tanıyan var?! Yaxud Şəbnəm Tovuzlunu?!”