Son günlərdə Türkiyədə məktəblilər arasında təhlükəli bir tendensiya yayılıb.
Qlobal.net xəbər verir ki, şagirdlər elektron siqaretləri məktəbə gizli şəkildə gətirmək üçün meyvə suyu qutularından istifadə etməyə başlayıblar.
Türkiyədə 2020-ci ildən bəri elektron siqaretlərin satışı qadağan olunub. Əvvəllər adi siqaretlərə nisbətən daha az zərərli alternativ kimi təqdim edilən bu cihazlar, meyvə və şirin dadlara sahib olması səbəbilə xüsusilə gənclər arasında populyarlaşıb.
Qadağaya baxmayaraq, bəzi mağazalar və onlayn platformalar vasitəsilə gizli şəkildə satılan bu cihazların qiymətləri 500-600 TL arasında dəyişir. Hətta istifadədən çıxmış cihazlar daha ucuz, 100 TL-ə qədər satılır. Təəssüf ki, bu zərərli vərdiş orta məktəb yaşlı uşaqlar arasında da yayılıb. Məktəblərdə aparılan yoxlamalarda elektron siqaretlərin aşkar edilməsi şagirdləri yeni üsullara əl atmağa vadar edib.
Bu yeni üsula əsasən, şagirdlər elektron siqaretləri boş meyvə suyu qutularına yerləşdirirlər. Daha sonra bu qutulardan pipet vasitəsilə guya meyvə suyu içirmiş kimi davranaraq əslində zərərli tüstü qəbul edirlər.
Bu təhlükəli tendensiyanın qarşısını almaq üçün məktəblərdə nəzarətin artırılması, valideynlərin və müəllimlərin məlumatlandırılması mühüm əhəmiyyət daşıyır. Gənc nəslin sağlamlığını qorumaq üçün bu kimi hallara qarşı birgə səylər tələb olunur.
228
