"Həmin Xalq artisti zamanında məni otağından çıxarıb demişdi ki, "Zülfiyyə kimdir ki, dünənin uşağını səhnəyə çıxarırsınız?"

 Bunu Moderator.az-a açıqlamasında tanınmış aşıq Zülfiyyə İbadova deyib. 

O daha sonra illər öncə başına gətirilmiş bir hadisəni bizimlə bölüşüb. “Ulduzum yeni-yeni parıldayırdı. Səid Rüstəmov adına Xalq Çalğı Alətləri orkestrı ilə Naftalanda məskunlaşan məcburi qaçqınlar üçün konsert verməyə yola düşdük. Xalq artisti Zümrüd Məmmədova və adını çəkmək istəmədiyim bir xanım, korifey sənətkarımız da bizimlə birlikdə idi. Ora çatar-çatmaz insanların böyük sevgisi ilə üzləşdim. Onlar rəhbərimizə demişdilər ki, ilk ifanı aşıq Zülfiyyə etsin. Özü də məni səhnədən buraxmırdılar. Elə oldu ki, mən ifa edəndən sonra həmin xalq artisti rəhbərimizə dedi ki, “Zülfiyyə kimdir? Dünənin uşağını niyə gətirib səhnəyə çıxarırsan?”. Həmin şəxs gətirib o xanım sənətkara gələn məktubları göstərdi ki, “bax, hamı onu istəyir, bir nəfər də sənin adını yazmayıb”. 

Mən ikinci dəfə də səhnəyə çıxmalı idim. Adını çəkmək istəmədiyim qadın xalq artisti səhnəyə çıxıb oxudu və sonda konsertin bitdiyini elan etdi. İnanın, mən də, konsert rəhbəri də pis günə düşdük. Konsertimizin rəhbəri həmin qadına ağzından çıxanı dedi. O da özünə haqq qazandıraraq dedi ki, “dünənin uşağını gətirib səhnəyə çıxara bilməzsən. Zülfiyyə məndən sonra ifa edə bilməz. O kimdir ki, məndən sonra ifa etsin? Ona bu cəsarəti kim verib? Hər kəs öz yerini bilməlidir”. İnanın.. Özü də yeni ailə həyatı qurmuşdum. O an mən sanki sındım, toparlana bilmədim. Həmin xanım sənətkarımızı uşaq yaşlarımdan çox sevirdim, bir saniyəyə gözümdən düşdü. Depressiyaya düşdüm, illərlə özümə gələ bilmədim. Ağlamaq istəyəndə Zümrüd xanım gəlib mənə dəstək oldu. Bir dəfə də başqa bir xanım sənətkarla eyni konsertdə, eyni otağa düşmüşdüm. Həmin qadın məni otağına buraxmadı, dedi ki, “nahaq yerə səni mənimlə birlikdə, eyni otağa salıblar”. Koridora çıxdım, məni sevilən sənətkarımız Flora Kərimova gördü. Niyə burada gözlədiyimi soruşdu. Ona dedim ki, məni filankəslə eyni otağa salıblar. Dedi ki, “can qızım, quzunu niyə canavara tapşırırlar?”. Məni otağına dəvət etdi. Otağa daxil olanda gördüm ki, Afaq Bəşirqızı da oradadır. O xanımın xasiyyətini hamı bilirdi. Afaq xanım məndən zarafatyana soruşdu ki, “Zülfiyyə, səni dişləmədi ki?” (gülür). Amma mən sənətə yeni gələn hər kəsə, hər zaman dəstək olmuşam. Bu gün də yolda əlində saz gördüyüm uşağın əyilib alnından öpüb, ona təşəkkür edirəm. Mən sənətə yeni gəldiyim illərdə bu cür haqsız münasibətlərlə üzləşmişəm. Amma yenə də mənə pislik edən o iki xanım sənətkarın mahnılarını bu gün dinləyirəm, onlara kinim yoxdur” deyə aşıq xanım bildirib. 

 Aşıq Zülfiyyə sənət dostu, aşıq Mübarizi toyda saz ifa edərkən stul üstündə göyə qaldırıldığı görüntülərinə də münasibət bildirib. “Mənə elə gəlir ki, burada Mübarizin günahı yoxdur. O saz ifa edəndə kimsə gəlib stulu arxadan yuxarı qaldırıb. Camaat tik-tok və digər sosial şəbəkələrdə paylaşmaq üçün hər cür işə əl atır. Burada saz çalanın günahı yoxdur, bunu edənin günahı var. O adam yəqin ki, pəhləvandır. Hər kəsin bir xasiyyəti var. Bu hərəkəti təbii ki, heç kəs mənə edə bilməz. Mübariz yəqin ki, üzüyumşağlığına salıb, gülüb, bu hərəkət də ordan qaynaqlanıb. Onu görəndə bir dost kimi sözümü deyəcəm” deyə aşıq bildirib.