Əri Rusiyada olan qadının şok əməli: On telefonu aşkarlandı, kişilərlə səs yazısı...

İstintaq orqanı tərəfindən Fatma barəsində Cinayət Məcəlləsinin 126.1-ci (qəsdən sağlamlığa ağır zərərvurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Fatma özünü qismən təqsirli bilib. O bildirib ki, zərərçəkmiş Nadir onun əridir, iki övladları var:
"Şəmkir rayonunun kəndində özümüzə məxsus evdə yaşamışıq. Nadir Moskva şəhərində işləyib. Noyabrın 21-də Nadir Rusiyadan Azərbaycana gəldi. Yaşadığımız evi təmir etdirdi və oğlum Əliyə sünnət toyu etmək qərarına gəldik.
Nadir gəldikdən sonra digər şəxslərlə əlaqə saxlamaq üçün istifadə etdiyim mobil telefonu dayım Vəlinin evinə qoyduğum əşyaların içində gizlətdim”.
"Araq içməyi tələb etdi”
Təqsirləndirilən şəxs qeyd edib ki, dekabrın 11-də oğlu Əlinin sünnət toyu Gəncə şəhərində yerləşən "Tural” şadlıq sarayında saat 15 radələrində başlayıb:
"Həmin gün gözəllik salonunda olanda Nadirin dayım Vəlinin evində gizlətdiyim mobil telefonu tapmasını sünnətdən bir gün sonra həmin telefonu onun əlində görəndə bildim. Dekabrın 14-də oğlum Əlinin evdə sünnəti oldu. Həmin günü mənim valideynlərim və qohumlarım, Nadirin valideynləri və qohumları bizə gəldilər. Saat 23 radələrinə kimi qohumlarımız evdə oldular və daha sonra getdilər.
Evdə özümüz qaldıq. Nadir məndən yemək istədi, ona yemək gətirdim. Nadir araq süzəndə mənə də süzdü, birlikdə araq içməyi tələb etdi. Mən məcbur Nadirlə araq içdim”.
"Məni biabır edəcəyini bildirdi”
Fatmanın sözlərinə görə, bundan sonra Nadir ona gizlətdiyi mobil telefonu tapdığını deyib:
"Telefonda olan səs yazılarına qulaq asdığını bildirdi. Məndən danışdığım şəxslərin kimlər olduğunu soruşdu.
Gizlətdiyim mobil telefonda əvvəllər tanış kimi "WhatsApp”da danışdığım şəxslərin səs yazıları olub. Nadirə söhbəti bağlamasını, sonra bu barədə danışmağı təklif etdim. Nadir mənimlə mübahisə etdi. Ona oğlumuz Əlinin təzəcə sünnət mərasiminin olduğunu, sakitləşdirici içib yatdığını dedim. Nadir bundan sonra sakitləşdi.
Amma yenidən araq içərək səslərə qulaq asdı, məni sorğu-sual etdi. "Atan və qardaşına zəng edib evə çağıracağam”, - dedi. Xahiş etdim ki, sabah deyər. O, başqa kişilərlə danışdığımı hamıya söyləyib, məni insanların yanında biabır edəcəyini bildirdi. Mən də bu barədə heç kimə deməməsi üçün ona yalvardım. Əlləri ilə mənim başıma və üzümə bir-iki dəfə vurdu”.
"Araq butulkasını başına vurdum”
Təqsirləndirilən şəxs bildirib ki, Nadir onu təhqir edəndə qorxutmaq məqsədilə masanın üzərində olan mətbəx bıçağını götürüb:
"Nadir əlində olan mobil telefonu üzümə çırpdı, dönüb gedəndə bıçaqla onun kürək nahiyəsindən bir dəfə vurdum. Üstümə yeriyib məni vurmaq istədi. Masanın üzərində olan araq butulkasını Nadirin başına vurdum və sonra evdən çölə çıxdım.
Nadir arxamca çölə gəldi. Qışqıranda qardaşı Sahib və Sahibin arvadı Aytən səsə bizə gəldilər. Sahib və Aytən mənim Nadiri bıçaqla vurmağımı bildilər. Onu qonşu Vasifin avtomobili ilə xəstəxanaya apardılar. Sonra hadisə yerinə polislər gəldilər”.
"Tualetdə telefonla danışdığını eşitdim”
Cinayət işi üzrə zərərçəkmiş qismində ifadə verən Nadirin sözlərinə görə, təqsirləndirilən Fatma onun arvadıdır:
"Biz 13 ildir ailə qurmuşuq. Böyük uşağım Samirənin 11 yaşı, kiçik oğlum Əlinin isə 7 yaşı var. Mən Rusiya Federasiyasının Moskva şəhərində olanda başqasının bankomat kartından pul çıxarmağıma görə 1 il 6 ay həbs cəzasına məhkum edildim. 1 il 8 gündən sonra azadlığa buraxıldım. Azadlığa çıxdıqdan sonra 1 il 7 ay orada işlədim və evimi təmir etdirmək üçün arvadıma pul göndərdim. Özüm isə noyabrın 20-də gəldim.
Evdə olan vaxtlarda bir dəfə Fatmanın tualetdə telefonla kiminləsə danışdığını eşitdim. Bunu özündən soruşanda ilk olaraq boynuna almadı. Lakin sonradan dayısı qızı Səidə ilə danışdığını dedi. Mən də Fatmaya inanmadım və nömrəyə gələn zəngləri çıxarmasını tələb etdim. Fatma etiraf etdi ki, bir tanışı ilə telefonla danışıb”.
"Bundan şübhələndim”
Zərərçəkmiş qeyd edib ki, oğlu Əliyə sünnət etmək istəyib:
"Fikirləşdim ki, sünnət toyundan sonra Fatma ilə danışıb ona xəbərdarlıq edərəm. Evdə olan vaxtlarda Fatmanın dayısının evinə tez-tez gedib-gəldiyini gördüm. Bundan şübhələndim. Fikirləşdim ki, bir dəfə Vəlinin evinə gedim və Fatmanın oraya apardığı əşyalara baxım.
Ola bilsin, Fatma sünnətə görə dayısının evinə müvəqqəti qoyduğu əşyaların içərisində məndən gizli işlətdiyi mobil telefon olar”.
"Şübhələnməsin deyə telefonları yerinə qoydum”
Zərərçəkmiş bildirib ki, dekabrın 9-da Fatma və uşaqları sünnət toyuna özlərinə paltar almaları üçün Gəncə şəhərinə aparıb:
"Oradan qayıtdıqdan sonra dayısı Vəlinin yaşadığı evə getdim və Fatmanın qoyduğu əşyalara baxdıqda sellofan torbanın içərisində 8 ədədi düyməli, 2 ədədi isə sensorlu, cəmi 10 ədəd mobil telefon olduğunu gördüm. Həmin telefonları bacımın yaşadığı evə apardım və orada hamısını yoxladım. Telefonlardan 2-3 ədədi istifadəyə yararlı oldu.
Telefonları yoxlamaq üçün özümdə saxladım. Fatma şübhələnməsin deyə qalan telefonları apararaq yerinə qoydum. Sünnət üçün dəvətnamələri payladım və istəmədim ki, sünnət toyu pozulsun. Fikrim o olub ki, sünnət toyu olduqdan sonra Fatma ilə söhbət edib, ondan ayrılmaq istədiyimi deyim, sakit şəkildə ayrılaq”.
"Özünü şübhəli aparırdı”
Nadirin sözlərinə görə, dekabrın 11-də oğlu Əlinin Gəncə şəhərində yerləşən restoranda sünnəti olub:
"Onun kəsilməsi üçün həmkəndlim Camalın Rusiyadan gəlməsini gözlədim. Camal dekabrın 14-də Azərbaycana gələcəyini bildirdi. Camalın gəlməsini və həmin tarixdə uşağın kəsilməsini qərar aldım. Dekabrın 12-də evdən getdim. Həmin günü axşam gələndə telefonların olduğu yerə baxanda bildim ki, Fatma telefonların yerini dəyişib.
Fatma artıq fikirli olur və özünü şübhəli aparırdı. Fatmanın gizlətdiyi telefonlardan artıq başqa kişilərlə danışmasını, səs yazılarını və nömrələrini əldə etmişdim. Sadəcə olaraq sünnət toyunun olub qurtarmasını gözlədim ki, özü ilə hərtərəfli söhbət edib, boşanmağı tələb edim”.
"Kişilərlə görüşdüyünü bildim”
Nadir qeyd edib ki, dekabrın 14-də oğlu Əlinin sünnəti yaşadığı evdə olub:
"Həmin günü öz yaxın qohumlarım evimə gəldi. Qohumlarımız getdikdən sonra evdə mən, Fatma və oğlum qaldıq. Qızım nənəsinin yanında qaldığına görə onlarla getdi. Fatmadan yemək gətirməsini istədim. Özümə araq süzəndə ona da süzdüm. Fatmadan arağı mənimlə birlikdə içməyi tələb etdim. Fatma 50 qram araq içdi. Ona görə araq içməsini istədim ki, aramızdakı söhbətə görə çox həyəcanlı olmasın, rahat söhbət edə bilək. Fatmanın gizlətdiyi telefonda olan kişi adlarını desin, həmin şəxslərlə gəzib-gəzmədiyini soruşum.
Fatma mənə heç kimlə gəzmədiyini dedi. Ona səs yazılarına qulaq asdığımı və kişilərlə görüşdüyünü bildirdim. Fatmanın yalan danışması məni əsəbiləşdirdi. Ondan səhvini etiraf etməsini, bundan sonra öz aramızda sakit şəkildə boşanmağı istədim. Lakin Fatma elə bir şeyin olmadığını təkrar dedi. Telefonundan götürdüyüm səs yazılarını özünə dinlətdim”.
"Kürəyimdən vurduğunu hiss etdim”
Nadir deyib ki, Fatma yerində quruyaraq qalıb və araq stəkanı əlindən yerə düşüb:
"Əsəbdən yerimdən durdum və ona bir-iki şillə vurdum. Fatma oğlum Əlinin yeni sünnət olduğunu, ağrıkəsici içərək yatdığını bildirdi, sakitləşməyimi xahiş etdi. Fatmaya etdiyinə görə atasını, qardaşını çağıraraq deyəcəyimi bildirdim. Yalvardı ki, gecdir, yataq, səhər ayıq başla söhbət edək.
Fatmanı şillə ilə vurmaq istədim. Masanın üzərində olan mətbəx bıçağını götürdü. Əlimdə olan mobil telefonla Fatmanın üz nahiyəsinin sol tərəfinə bir dəfə vurdum. Buna görə də üzü çapılaraq qanadı. Siqaret çəkmək üçün gedəndə Fatmanın arxadan məni bıçaqla kürək nahiyəmdən vurduğunu hiss etdim. Geri dönərək Fatmanı vurmaq istəyəndə o, masanın üzərində olan butulka ilə başıma vurdu. Başımdan qan gəldiyini gördüm və çölə çıxaraq qışqırdım. Səsimə qardaşımla arvadı gəldi.
Qardaşım qan itirdiyimi gördü və oradan qonşunun avtomobili ilə məni Gəncə şəhərinə apardılar. Məni Gəncə şəhərində yerləşən Beynəlxalq xəstəxanaya apardılar. Üstümüzdə pul olmadığına görə məni Gəncə şəhərində Abbas Səhhət adına xəstəxanaya gətirdilər. Orada əməliyyat olundum”.
Bu cinayət işinə Gəncə Ağır Cinayətlər Məhkəməsində baxılıb. Məhkəmənin hökmü ilə Fatmanın barəsində Cinayət Məcəlləsinin 70.1 və 70.3-cü (şərti məhkum etmə) maddəsi tətbiq olunub.
Fatma 2 il sınaq müddəti olmaqla 3 il şərti cəza alıb.