Bir çox insan milyarderləri dəbdəbəli həyat tərzi və bahalı geyimlərlə təsəvvür edir.
Lakin Twitter-in keçmiş CEO-su, milyarder Cek Dorsi (Jack Dorsey) bu stereotipi tamamilə dəyişir. Sadə və yoxsul görünüşü ilə diqqət çəkən Dorsey, sərvəti ilə yanaşı, minimalizmi və fərqli həyat tərzi ilə məşhurdur.
Cek Dorsi (Jack Dorsey) kimdir?
Vurğulanır ki, Cek Dorsi (Jack Dorsey), 2006-cı ildə Twitter-in həmtəsisçilərindən biri olaraq texnologiya dünyasında tanındı. O, sosial media platformasını qlobal səviyyəyə çatdıran əsas fiqurlardan biri olub. 2021-ci ildə Twitter-dən ayrıldıqdan sonra daha çox öz şəxsi layihələrinə və maraqlarına diqqət yetirməyə başladı.
Cek Dorsi həmçinin "Block" (əvvəlki adı Square) şirkətinin həmtəsisçisi və CEO-su kimi fəaliyyət göstərir. Bu şirkət rəqəmsal ödənişlər sahəsində innovativ həllər təqdim edərək Dorsinin sərvətinin əsas mənbəyinə çevrildi. Hazırda onun sərvəti təxminən 5.3 milyard dollar qiymətləndirilir.
Cek Dorsinin görünüşü, digər milyarderlərdən çox fərqlidir. O, tez-tez minimal tərzdə, rahat və diqqət çəkməyən geyimlərdə ictimaiyyət qarşısına çıxır. Təqdim etdiyimiz şəkildə onun üzərində sadə "Satoshi" yazılı köynək və rahat ayaqqabılar görmək mümkündür. Bu tərz, onun həyatında minimalizmi və sadəliyi ön plana çıxardığını göstərir.
Dorsi həmçinin meditasiya, yoqa və alternativ həyat tərzi ilə maraqlanır. O, tez-tez günlər boyu oruc saxladığını, meditasiya düşərgələrində iştirak etdiyini və səhər tezdən uzun məsafələrdə piyada gəzməyi sevdiyini qeyd edir.
Cek Dorsi, xüsusilə Bitcoin və digər kriptovalyutaların böyük dəstəkçisidir. O, Bitcoinin gələcəyin valyutası olacağına inanır və bu istiqamətdə mühüm addımlar atır. Dorsinin şirkəti "Block" rəqəmsal valyuta ödənişləri və blockchain texnologiyalarının inkişafına xüsusi diqqət yetirir.
Filosof milyarder
Dorsi yalnız biznes dünyasında deyil, həm də şəxsi dəyərləri ilə tanınır. O, həyat tərzində "maddiyyatdan çox mənəviyyat" prinsipini önə çəkir. Bir çox insan onu "filosof milyarder" adlandırır, çünki o, sadəcə sərvət toplamaqla deyil, dünyaya töhfə verməklə maraqlanır.
Cek Dorsinin həyatı göstərir ki, sərvət və uğur həmişə dəbdəbəli həyatla bağlı deyil. O, sadəliyi ilə insanlara fərqli bir baxış bucağı təqdim edir. Milyardlarla dollar sərvətə sahib olsa da, Dorsey-in minimalizm və sadəlik üzərində qurduğu həyat tərzi bir çox insan üçün ilham mənbəyidir. (Musavat.com)
47
