Parklanma qaydalarının pozulmasına görə nəzərdə tutulmuş cərimələr artırılır. Bununla bağlı ''yol hərəkəti haqqında'' qanuna və ''inzibati xətalar məcəlləsinə bəzi dəyişikliklər təklif edilir. Bundan başqa artıq kameralarla da dayanma və durmaya nəzarət ediləcək. Qaydaları pozanlar xüsusi texniki vasitələrlə cərimə olunacaqlar.
Dayanma, durma, parklanma, o cümlədən ödənişli parklanma ilə bağlı cərimələr artırılır.
Bu məsələ İnzibati Xətalar Məcəlləsinə təklif edilən dəyişikliklərdə öz əksini tapıb. Layihəyə əsasən, parklanma yerlərinin təşkili və istifadəsi qaydalarının pozulmasına görə nəzərdə tutulmuş maddələr təkmilləşdirilir. Belə ki, ödənişli parklanma yerlərində avtomobilini saxlayıb pul ödəmədikdə və ya parklanma yerindən ödəniş edilmiş müddətdən artıq istifadə üçün əlavə ödəniş etmədən sürücünün ərazini tərk etməsinə görə on manat məbləğində cərimə tətbiq ediləcək.
Yol hərəkəti üzrə ekspert Ərşad Hüseynov deyir ki,əlilliyi olan şəxslərin nəqliyyat vasitələri üçün nəzərdə tutulmuş parklanma yerlərində digər avtomobillərin parklanmasına görə olan cərimə 10 manatdan 20 manata qaldırılacaq.
Müddətdən artıq parklanmaya görə də cərimələr nəzərdə tutulub. Belə ki, nəqliyyat vasitəsini 48 saatdan çox parklanma yerində saxlayanlar 20 manat cərimə ediləcəklər. Hazırda bu müddət 24 saatdır. Ərşad Hüseynov sözlərinə görə, dayanma və durma qaydasını pozan sürücülərə bundan sonra kamera vasitəsilə də cərimə tətbiq oluna biləcək.
"Yol hərəkəti haqqında'' qanuna isə "velosiped zolağı'', ''velosiped yolu'' kimi anlayışlar daxil edilir və onların mahiyyəti təsbit edilir. Təklif edilən digər dəyişikliklə velosipedçinin vəzifələri artırılır. Mühərriksiz velosipedi idarə edən şəxs xüsusi velosiped yolları ilə hərəkət edə biləcək.
327
