21 yaşlı qız bütün dünyanı necə doladı?
21 yaşlı bu qız bütün dünyanı aldatmağı ilə tarixə düşüb. Anna Sorokina (Sorokin) 1991-ci ildə Rusiyada Kamaz sürücüsünün ailəsində anadan olub və sonradan Almaniyaya köçüb.
Qlobal.net xatırladır ki, o, gənclik illərində sadə bir ailədə böyüsə də, hər zaman dəbdəbəli həyat arzusunda olub. ABŞ-a köçəndən sonra özünü zəngin alman varisi kimi təqdim edərək “Anna Delvey” adı ilə tanınıb.
Dünyanı aldatma planı necə başladı?
Nyu-Yorkun elit dairələrinə daxil olmaq üçün Anna özünü milyonlarla sərvətə sahib varis kimi göstərirdi. O, bahalı otellərdə qalır, dəbdəbəli restoranlarda yeməklər sifariş edir, məşhur şəxslərlə dostluq edirdi. Ən maraqlısı isə odur ki, bütün bunların heç birini real pul ilə ödəmirdi – kreditlər, yalan və saxta sənədlərlə özünü zəngin biri kimi göstərirdi.
Qlamur həyatın kulminasiyası
Qlamur partilərdə görünüb, etibar qazanan Anna 2016-cı ildə Nyu-Yorkun gecəsi 400 dollar olan ən lüks otellərindən birinə yerləşib. Bu tarixdən etibarən, 10 ay ərzində milyoner kimi yaşayıb. Qaldığı oteldə ofisiantlara 100 dollar verərək, varlı şəxslərə onun haqda danışılmasını istəyib. Dost çevrəsini genişləndirən Anna İnstaqramda da özünə səhifə yaradaraq, lüks yaşam tərzi ilə diqqət çəkib.
Bir müddət dostları ilə özəl yaxtada tətilə çıxıb. 35 min 400 dollarlıq yaxta məsrəfini isə ödəməyib. Eyni il Mərakeşdə gecəsi 7 min dollarlıq oteldə tətilə gedib. Lakin geri dönəndə qaytaracağını söz verərək, otelin 62 min dollarlıq xərclərini dostuna ödətdirib.
Ən böyük fırıldağı
Anna Sorokina 25 milyon dollarlıq investisiya fondu yaratmaq planı ilə bankirləri, iş adamlarını və sənət dünyasının tanınmış insanlarını inandırmağa çalışırdı. “Anna Delvey Foundation” adlı bu layihə üçün böyük məbləğdə kredit almağa cəhd edib. Onun saxta sənədlərlə bankları aldatması sonradan ifşa olundu.
Necə yaxalandı?
2018-ci ildə Anna Sorokina fırıldaqçılıq, saxta sənəd hazırlamaq və yüz minlərlə dollar borc toplamaq ittihamı ilə həbs olundu. 2019-cu ildə məhkəmədə təqsirli bilinərək 4 ildən çox həbs cəzası aldı. Maraqlıdır ki, həbsxanada olduğu müddətdə belə Anna dünya mediasının gündəmindən düşmədi.
Niyə bu qədər məşhur oldu?
Onun hekayəsi sadəcə fırıldaqçılıqdan ibarət deyildi. Anna Sorokina özünü təqdimetmə bacarığı, cəsarəti və elit dairələri inandırmaq qabiliyyəti ilə diqqət çəkdi. Netflix onun həyatını “Inventing Anna” adlı serialda ekranlaşdırdı və bu, hekayəni daha da populyar etdi.
21 yaşında sadə bir qızın özünü zəngin varis kimi göstərərək bütün dünyanı aldatması bir çoxları üçün həm şok, həm də maraqlı bir hekayə oldu. Anna Sorokina nümunəsi göstərdi ki, bəzən görüntülər və cəsarət insanlara inanılmaz qapılar aça bilər – amma sonda həqiqət gec-tez üzə çıxır.
Murad
Qlobal.net
