Arvadının və oğlunun müflis etdiyi Azərbaycan milyonçusu – Maraqlı faktlar

Bu milyonçunu müsəlman arvadı və böyük oğlu elə müflis edirlər ki, o, özünü öldürmək qərarına gəlir.

Qlobal.net xəbər verir ki, silahı gicgahına tuşlayanda onu ölümdən xilas edən yaxın dostu Ağa Musa Nağıyev olur.

Bakıda işlərinin çox yaxşı getdiyini görən milyonçu bütün işləri böyük oğluna tapşıraraq Rusiyaya getmək qərarına gəlir. Bir müddət Moskvada və Sankt-Peterburqda yaşayır. O, burada olarkən Mariya Petrovna adında rus qadınla ailə həyatı qurur. Onun bu evliliyinə həm müsəlman xanımı, həm də böyük oğlu qarşı çıxır və dava-dalaş salırlar.

Günlərin bir günü milyonçu öz zavod müdirinə teleqram vurur ki, sən kiçik sahibkarlardan nefti ucuz qiymətə al, anbarlarda saxla. Mən vaxtı gələndə həmin nefti Rusiyadakı şirkətlərə baha qiymətə satacam. Çünki rus şirkətləri ilə müqavilə imzalamışam, mənə külli miqdarda xam neft lazımdır.

Bakıya gələndə məlum olur ki, onun teleqramı zavod müdirinə çatmayıb. Poçt idarəsini araşdırırlar və poçdan məlumat verilir ki, həmin teleqram onun böyük oğlundadır. Oğlu isə anası ilə birləşərək teleqramı gizlədir. Atasının Bakıya gəldiyindən xəbər tutan oğlu anasını İrana Xorasan ziyarətinə aparır.

İşin bu yerdə olduğunu görən milyonçu öz əlindəki bütün nefti Rusiya şirkətlərinə satmaq məcburiyyətində qalır. Hətta xammal bəs etmədiyinə görə, o, rus şirkətlərinə borclu qalır. Borcunu ödəmək üçün gəmilərini, zavodunu və ramanıdakı neft mədənini də satır. Müflis olduğunu görəndə isə intihar etmək istəyir.

Bu zaman Ağa Musa Nağıyev ona müddətsiz və külli miqdarda borc verərək öz əmircanlı dostunu ölümdən xilas edir.  Daha sonra bu dostluq əlaqələri qohumluğa çevrilir. Milyonçunun birinci arvadında 5 övladı var idi: iki oğlu-Əli və Mirzə, üç qızı – Sara, Xədicə və Ağabacı.

Milyonçunun böyük oğlu Mirzə Nağıyevin qızı Ümbülbanu ilə, qızı Xədicə isə Nağıyevin qardaşı Yusiflə evlənir. Digər oğlu Əli isə H.Z. Tağıyevin qızı  Leyla xanımla ailə qurur.

Üç böyk milli sahibkarın qohumluğu onların həm dostluq, həm də işgüzar əlaqələrini daha da möhkəmləndirir.

Bilirsiniz bu milyonçu kimdir? Həm Tağıyevin, həm də Nağıyevin qudası, ictimai xadim, yüzlərlə gənci Avropada və Rusiyada oxutduran xeyriyyəçi Şəmsi Əsədullayev.